నా బెంగళూరు బుర్రకి ఇది అర్థం కావట్లేదు: హైదరాబాద్‌పై యువకుడి పోస్ట్ వైరల్

"నా బెంగళూరు బుర్ర ఇది అర్థం చేసుకోలేకపోతోంది"... అంటూ బెంగళూరుకు చెందిన ఓ యువకుడు చేసిన ట్వీట్ ఇప్పుడు సోషల్ మీడియాలో హాట్ టాపిక్‌గా మారింది. హైదరాబాద్ నగరంలోని రోడ్లు, ప్రయాణ సౌకర్యాలను చూసి ఆశ్చర్యపోతూ అతడు ఈ వ్యాఖ్య చేశాడు. బెంగళూరు ట్రాఫిక్‌తో పోలిస్తే హైదరాబాద్ ప్రయాణం ఎంతో సాఫీగా ఉందని అభిప్రాయపడ్డాడు.

వివరాల్లోకి వెళితే, బెంగళూరుకు చెందిన ఆర్చీ సేన్‌గుప్తా అనే వ్యక్తి ఇటీవల హైదరాబాద్ వచ్చాడు. ఇక్కడ తన ప్రయాణ అనుభవాన్ని సోషల్ మీడియా ప్లాట్‌ఫామ్ 'ఎక్స్' లో పంచుకున్నాడు. "నేను ప్రస్తుతం హైదరాబాద్‌లో ఉన్నాను. కేవలం 30 నిమిషాల్లో 12 కిలోమీటర్లు ప్రయాణించాను. నా బెంగళూరు మెదడు ఇది అర్థం చేసుకోలేకపోతోంది. బెంగళూరులో 30 నిమిషాలకు మహా అయితే ఒక కిలోమీటర్ వెళ్లగలం. హైదరాబాద్ ఇన్‌ఫ్రాస్ట్రక్చర్ నిజంగా అద్భుతంగా ఉంది" అని ఆయన తన పోస్ట్‌లో పేర్కొన్నాడు.

ఈ పోస్ట్ కొద్ది సమయంలోనే వైరల్ అయి వేలాది వ్యూస్ సాధించింది. చాలా మంది నెటిజన్లు ఆర్చీ అభిప్రాయంతో ఏకీభవించారు. హైదరాబాద్‌లోని విశాలమైన రోడ్లు, ఫ్లైఓవర్లు, ఔటర్ రింగ్ రోడ్ (ఓఆర్ఆర్) ప్రయాణ సమయాన్ని బాగా తగ్గించాయని కామెంట్లు చేశారు. ఒక యూజర్ తాను ఆఫీస్ నుంచి సాయంత్రం 6 గంటలకు బయలుదేరితే 50 కి.మీ. దూరాన్ని 45-55 నిమిషాల్లో చేరుకుంటానని చెప్పగా, "బెంగళూరు ట్రాఫిక్ వల్ల 5 కి.మీ. ప్రయాణం కూడా చాలా పెద్ద దూరంగా అనిపిస్తుంది" అని మరొకరు వ్యాఖ్యానించాడు.

అయితే, కొందరు మాత్రం హైదరాబాద్‌లోనూ పీక్ అవర్స్‌లో ట్రాఫిక్ రద్దీ ఉంటుందని, బహుశా అతడు ఆదివారం ప్రయాణించి ఉండొచ్చని అభిప్రాయపడ్డారు. "హైదరాబాద్ ఇంకా బెంగళూరు స్థాయికి పడిపోలేదు, కానీ త్వరలోనే ఆ పరిస్థితి రావచ్చు" అని ఒకరు హెచ్చరించారు. మొత్తంగా ఈ పోస్ట్, రెండు ప్రధాన నగరాల మధ్య మౌలిక వసతులు, ట్రాఫిక్ నిర్వహణపై విస్తృత చర్చకు దారితీసింది.